بیانيې

د افغانستان ـ امریکايي پوهنتون د محصلینو د فراغت په مراسمو کې د افغانستان د اسلامي جمهوریت د ملي امنیت سلاکار ډاکټر حمدالله محب د وینا متن:

 

بسم الله الرحمن الرحیم

اجراییه رییس ښاغلی ډاکټر عبدالله عبدالله، د افغانستان امریکايي پوهنتون مشر ښاغلی هولنډ، ګرانو استادانو او فارغ التحصیلانو!
نن غواړم خپلې خبرې د افغانستان امریکايي پوهنتون د ۲۰۱۹ کال فارغانو ته د مبارکۍ په وړاندې کولو سره پيل وکړم:
ماته زیات د خوښۍ ځای دی چې ستاسو د ژوند په ځانګړو مراسم کې تاسو ته وینا کوم.
دغه ورځ او پېښه د افغانستان له ټولنې، په ځانګړې توګه د افغانستان له اکاډمیکې جامعې سره د دغه پوهنتون د علمي پلاوي / ښوونکو د همکاریو یادول دي. زه او میلیونونه نور افغانان په یاد لري چې دغه بنسټ د همکاریو د تحقق لپاره، قرباني هم ورکړې ده.
دغه بنسټ له تاوتریخوالي او جګړې سره د تل پاتې مبارزې او د هغې د له منځه وړلو لپاره یواځینۍ لار چې ټاکلې او ورته ژمن دی، د دې هېواد متسعدو افرادو ته د با کیفیته زده کړو ارئه کول دي. له فرصت څخه په استفادې، غواړم د افغانستان ـ امریکايي پوهنتون د هغو زړورو استادانو او محصلینو روح ته دعا وکړم چې د ۲۰۱۶ کال ټرورېسټې پېښه کې يې خپل ژوند له لاسه ورکړی دی. مونږ د هغوی تشه احساسوو او له هغوی منندوی یوو، هغه دَین چې زمونږ پر غاړه دی، له هغه زیات دی چې مونږ يې وکولای شو اداء کړو.
همدا شان، زمونږ زړه د ټیموټي وېکس او کوین کېنګ چې اوس هم د طالبانو په منګولو کې دي، تپېږي. زه یو ځل بیا په بشپړ مصونیت خپلو کورنیو ته ددغو دوو محترمو شخصیتونو د بېرته خلاصون لپاره د حکومت له اړخه د ملاتړ ډاډ ورکوم.
د افغانستان امریکايي پوهنتون د نسلي تغییر د تحقق لپاره د جمهور رییس غني له هغه لید لوري سره چې ځوانان د هېواد د ابادۍ لپاره اړینه اړتیا او ځواکمن قدرت دی، مرسته کوي. د انکشاف او بیا رغاونې د بهیر په جریان کې مونږ د نړیوالې ټولنې په ځانګړې توګه د امریکا متحدو ایالتونو له مرستو مننه کوو.
له امریکا متحدو ایالتونو او له نړیوالو متحدینو سره زمونږ همکاري، هغه همکاري ده چې د وینې، زیار او قربانیو په اساس جوړه شوې ده. دغه همکاري د افغانستان ــ امریکايي پوهنتون په شمول، د زیاتو نورو اسانتیاوو د رامنځته کېدو لامل شوې دی.
دغه پوهنتون پر دې ګواهي ورکوي، چې له ستونزو سره ــ سره او هغه ننګونې چې زمونږ په لار کې پرتې دي، د افغانستان او امریکا متحدو ایالتونو همکاري همدا شان ټینګه ده او زمونږ هېوادونه د کلیدي متحدینو په توګه له مشترک لید لوري، د هېواد د هوسا او سوله ییزې راتلونکې لپاره فکر کوي. دواړه هېوادونه د پوهنې او پرمختګ په شمول د مشترکو ارزښتونو په تحقق باور لري.
نن پر داسې مهال تاسو ته وینا کوم چې زرګونه ځوانان د افغانستان د ملي امنیتي او دفاعي ځواکونو په لیکو کې حضور لري او په دوامداره توګه هغه ارزښتونه چې په ګډه مو تر لاسه کړي دي، دفاع ترې کوي. هغه ارزښتونه چې مونږ سره نږدې کوي، هغه ارزښتونه چې د هغه لپاره مو مبارزه کړې ده؛ حکومتولي، د قانون حاکمیت، عدالت او خپلواکي. د افغانستان امنیتي او دفاعي قوتونه، د هېواد ستایل شوي قهرمانان دي. هغوی د هغه افغانستان لپاره جګړه کوي چې په هغه کې افراد، قومونه او جنګسالاران د ژوند تګلاره تعیین نه کړي، بلکې د هغوی پر ځای خپله خلک د ولسواکه بهیرونو له لارې خپل برخلیک وټاکي. دغه چاره د افغانستان د تل پاتې سولې اړوند د جمهور رییس غني له لید لوري سره یو شان ده، هغه لید لوری چې په هغه کې ټولنیز او ساختاري تاوتریخوالی پای ومومي او ځای یې عزت او هوساینه ونیسي.
اوس د څوو مهمو پیغامونو په ارائه کولو، ستاسو محترمو محصلینو له چوپړ څخه مخه ښه کوم.
لومړنی پیغام مې دا دی چې تاسو، د هېواد د نېک نومي پوهنتون د فارغانو په توګه، د رهبرۍ مسوولیت پر غاړه لرئ. رهبري یانې د هغو پرېکړو نیول چې په نورو آغېز ولري؛ په بل عبارت، تاسو مسوولیت لرئ چې په ښه ډول د هېواد ملي ګټو ته خدمت وکړئ. هیله لرم چې تاسو له دغه مسوولیت او روحیې سره د هېوادوالو خدمت ته ور ودانګئ.
دویم، تاسو په مکرر ډول د افغانانو د نوي نسل او د هغه نسل په توګه چې د تېرو دوو لسیزو د مثبتو تغییراتو استازولي کوئ، مخاطب کېږئ. دا کاملآ واضح ده؛ خو له تاسو څخه په ټینګار سره غواړم، د هغه څه په اړه چې ستاسو نسل متمایز او تعریف کوي، په ژور ډول فکر وکړئ؛ په بل عبارت، له نسل څخه مو ستاسو تعریف څه شی دی؟
آیا تاسو به هغه نسل و اوسئ چې له تېرو ترخو پېښو، قید او بند څخه خلاص شئ؟ آیا هغه نسل به و اوسئ چې مونږ له وابستګۍ څخه د ځان بساینې پر لور بوځي؟ آیا هغه نسل به و اوسئ چې اختلافونه یوې خوا پرېږدئ او د شخصي ګټو پر ځای، د هېواد ګټو، سولې او هوساینې لپاره خدمت وکړئ؟ دا تاسو پورې اړه لري چې له هغه څخه کوم تعریف کوئ.
درېیم، تاسو له مېرمنو او سړیانو توپیر لرونکې هغه ډله یاست چې د هېواد له ۳۴ ولایتونو، د کورنیو له بطن، قومونو او بېلا بېلو کلیو دلته حضور لرئ؛ دغه امر تفاوت نه ایجادوي. زه نن تاسو ننګوم، د تېر په اړه مو او له هغه ځایه چې تاسو راغلي یاست، فکر مه کوئ، بلکې په دې اړه فکر وکړئ چې د رهبرانو د یوې ډلې په توګه به چېرې ځئ او د ځان لپاره به څه ډول راتلونکې جوړئ. هغه ځای ته چې تاسو ځئ، هېواد به هم همغه لوري ته ځي. ستاسو فکر باید د راتلونکي په اړه وي او هغه امکانات چې موجود دي، الهام ترې واخلئ.
خپلې خبرې مې خپلو هغو هېوادوالو او نړیوالو همکارانو ته چې د غوره افغانستان لپاره یې زیاتې قربانۍ ورکړې دي او د افغانستان ـ امریکايي پوهنتون په څېر بنسټ ته یې د حضور زمینه برابره کړې ده، د دعا په ویلو پای ته رسوم. تاسو ته په خپلو چارو کې د بري هیله کوم، ستاسو او د ګران افغانستان لپاره د موفقیت دعا کوم.

د آسیا په انجمن (Asia Society) کې د افغانستان د اسلامي جمهوریت د ملي امنیت سلاکار ډاکټر حمدالله محب د وینا ژباړه:

امریکا متحده ایالات

د لوی او بښونکي خدای ج په  نامه

د « آسیا انجمن » څخه مننه کوم چې زه یې رابللی یم. له سفیر شرین او پروفیسور رابین  څخه مننه. د ولسمشر په شمول نورو افغانانو ته د خبرو کولو د فرصت برابرېدو په اړه ستاسو له هڅو مننه کوو. کله  چې زه تېر کال دلته سفیر وم، د افغانستان روبات جوړونکو نجونو ټیم راغلی و او دلته یې حضور موندلی و او د آسیا انجمن جایزه یې تر لاسه کړه.

خوښ یم داسې یو وخت کې مې دلته حضور پیدا کړ چې آغلې عادله راز ملګرو ملتونو کې د افغانستان د دایمي استازې په توګه خپله نوې دنده پیل کړې ده، البته دا لومړنۍ افغان مېرمن ده چې له افغانستان څخه استازیتوب کوي. همدا شان مرجان متین، داسې لیدل کېږي چې دلته زیاتې افغان مېرمنې شتون لري، دلته زمونږ شمېر زیات دی، دا یو عالي کار دی!

که چېرې تاسو دلته د افغان نجونو له روباټ جوړوونکو ټیم سره ملاقات کړی وي، ممکن ددې ټیم له کپټانې فاطمې قادریان سره به مو هم کتلي وي. منظور مې دا دی چې هغه فوق العاده ده. کله چې خبرې کوي، فکر کوئ چې شعرونه وايي. زما په نظر مناسبه ده چې د افغانستان د روباټ جوړوونکو له ټیم او له مېرمن قادریان یادونه وکړو، ځکه نن غواړم د افغانستان د خلکو په اړه خبرې وکړم. د هغوی باور، هڅې، ارزښت، اهمیت، شخصیت، باور او د سولې لپاره یې لید لوري ددې لامل کېږي چې په اړه یې باید خبرې وشي.

کله مې چې امریکا کې د افغانستان د سفیر په توګه دنده ترسره کوله، پوه وم چې افغانستان د امریکا په هر ځای کې د بحث وړ دی او په هر تحقیقي او اکاډمیک مرکز کې پرې بحث کېږي. باید ووایو چې زمونږ خلک زمونږ تر ټولو ستره پانګونه ده. زما په نظر تېرو ۱۸ کلونو کې مو چې کوم بدلون ترسترګو کړی دی، باید داسې تر ملاحظې لاندې ونیول شي چې مونږ د سولې پر لور روان یو.

تېره میاشت افغانستان کې د امنیتي او دفاعي ځواکونو ورځ ونمانځل شوه. زه په ملي دفاع وزارت کې د یو شمېر سربازانو د ترفیع شاهد وم. له دې افسرانو یوه يې تورن مرسل افشار وه، هغه ځوانه مېرمن چې په ویاړ يې له لومړي بریدمنۍ تورنۍ ته ترفیع واخېسته او سټیج پر لور يې ګام پورته کړ. د هغې له مسلکیتوب او وطنپالنې زه تاثیر لاندې راغلم.  هغه تاثیر لرونکې واقع شوه او له هغو کسانو يې استازیتوب وکړ چې همدا اوس له هېواد او ځمکنۍ بشپړتیا دفاع او له یو نړیوال جنګ سره د مبارزې په لومړۍ کرښه کې دي. وړتیا شور او ځواک مې چې د تورن مرسل په وجود کې ولیدل، تشریفاتي نه و.

سربېره پر دې، ما د هغو سرتېرو درنې خبرې هم اورېدي چې روغتون ته یې د پوښتنې لپاره ورغلی وم. زمونږ د پولیسو او اردو زیات شمېر سرتېري چې په جګړو کې دوه درې ځلې ټپیان شوي وي، بیا هم د جګړې ډګر ته ستانه شوي دي. هره ورځ امنیتي راپورونه لولم، یو هغه راپور چې طالبانو د اردو سرتېري محاصره کړي و، زما زیاته توجه يې را جلب کړه. هغوی له ستونزو سره سره، وجنګېدل خو تسلیم نه شول، ټولو د تسلیمۍ پر ځای وژل کېدو ته لومړیتوب ورکړ.

۲۰۱۴ کال کې د امنیتي مسوولیتونو د اخېستو تر څنګ او وروستیو پنځوو کلونو کې چې کوم لوړ تلفات مونږ ورکړي دي، بیا هم د امنیتي او دفاعي ځواکونو لیکو کې استخدام بېساری و. ولې داسې؟ زمونږ سرتېري جګړه کوي، ځکه د هغه لپاره جګړه کوو چې مونږ پرې باور لرو او ارزښت راته لري. پوهېږو چې زمونږ د ژوند ارزښت لري. په همدې دلیل ځوانه فاطمه قادریان افغانستان کې د یو ټکنالوژيکي پوهنتون د جوړوېدو فکر په سر کې لري، په داسې حال کې چې پلار يې هرات کې د داعش د یو برید پر مهال شهید شوی دی.

د هرې ورځې په تېرېدو سره، امنیتي او دفاعي ځواکونه نږدې وینم. هغوی د هغه لوی بدلون یوه برخه ده چې ټول هېوا، ښار او کلو کې ترسره شوی دی. هغوی د نوي افغانستان نسل دی. مونږ اساسي قانون او افغانستان کې په دولتي بنسټونو، بشري او مدني حقونو باور لرو. مونږ په پرمختګ، معارف او اسلامي ارزښتونو باور لرو. مونږ په خپل ملت او دولت ویاړو او تر څنګ يې اراده لرو هغه څه مو چې تېرو ۱۸ کلونو کې تر لاسه کړي دي، د ساتنې لپاره یې قرباني ورکړو.

په همدې اساس، د نوي افغانستان لپاره د پالیسۍ پایله به د افغانستان د حکومت او نړیوالو همکارانو لپاره څه وي؟ لومړی د افغانستان خلک د ټاکنو ترسره کېدو تمه لري، چې البته د سولې بهیر بري پورې هم تړلی دی. هغه بهیرونه چې د افغانستان له تېرو ۱۸ کلونو سره رېښې لري مختل شي او یا هم د سولې لپار له پامه وغورځول شي، نو دا په دې مانا چې مونږ د ولسواکۍ اصل تر پښو لاندې کړ او د ولسواکۍ اړوند مو د افغانستان د خلکو په باور خیانت ترسره کړ.

دویم، افغانستان کې د تل پاتې سولې تامین لپاره اړتیا ده چې د خلکو غوښتنو ته پام وشي. د تېر کا په جریان کې افغانانو د سولې لپاره خپل غږ پورته کړ او برنامې يې ورته جوړې کړې. د هلمند د سولې کاروان تېر کال کې خپل سفر پیل کړی دی او اوس هم په پلي پښو ټول هېواد کې خپل سفر ته دوام ورکوي. د تېر کال په ډسمبر میاشت کې د هېواد له ۳۴ ولایتونو ۲۵۰۰ مېرمنې او سړیان کابل کې سره راټول شول، تېره میاشت د هېواد له ټولو ولایتونو ۳۵۰۰ مېرمنې د لویې جرګې خېمه کې سره را غونډې شوې او د ۱۵ زره افغان مېرمنو غږ یې پورته کړ. د هغوی غوښتنه څه ده؟ له کوم ځایه چې د سولې او جګړې له تجربو لید لوري او نظریات توپیر لري، د سولې لپاره بیه او هغه څه چې د سولې لپاره منل کېږي، دا هم توپیر لري. خو د مېرمنو اصلي غوښتنه دا ده چې له هغوی دې استازیتوب وشي. افغانستان د سولې د ټولشمولې پروسې غوښتونکی دی چې تل پاتې سولې تامین ته زمینه برابره کړي.  هغوی د هغو بهیرونو غوښتونکي دي چې د افغانانو ترمنځ وي. نه د څوو کسانو ترمنځ معامله چې د تړلو دروازو تر شاه او زماني فشار ته په کتو ترسر شي. هیله مند یم کوم موضوعات مې چې ذکر کړل، د افغانستان د اوسني وضعیت په اړه تاسو ته لیدلوری بیان کړي.

اوس غواړم هغه څه چې واشنګټن ته د علاقې وړ دي یاد کړم، هدف مې ارقام دي. لکه څنګه چې مونږ د سولې په لټه کې یو، له ترهګرۍ سره مبارزه کې زمونږ نظامي اهداف لا هم پر خپل ځای دي او د رسېدو لپاره یې هڅې کوو. د جنګي قوې د دوام لپاره یوازې انګېزه او وطنپالنه کافي نه دي. مونږ تېرو ۵ کلونو کې پر امنیتي سکټور له سره کتنه کړې ده، د اړتیا وړ رهبري او مدیریت مو ورته برابره کړي دي. مونږ د کومانډو سرتېرو په دوه چنده کېدو او د هوايي ځواکونو په درې برابرېدو کار کوو چې اوس د پرمختګ په حال کې دی. مونږ له نړیوال بانک سره کار کوو چې څنګه وکولای شو افغان امنیتي او دفاعي ځواکونه تر راتلونکو څلورو یا پنځوو کلونو تمویل کړي، خو  په مډرنې ټکنالوژۍ د سمبالېدو او د افغان قواوو د توسعې، ودې او تجهیز لپاره اړتیا ده چې نړیوال همکاران تر ۲۰۳۰ کال پورې مونږ سره مرستې وکړي.

د ۲۰۱۳ کال ټاکنو په کمېسیونونو کې بې نظمي او د مدیریت کمزورتیا څرګند کړل. ۴ میلیونونه افغانانو چې ۳۵ سلنه یې مېرمنې وې، له خطرونو سره سره لاړل د رای مرکزونو ته. په شرایطو برابر دغه کسان به بیا هم د ولسمشرۍ ټاکنې چې په جولای میاشت کې ترسره کېږي خپله رایه کاروي. تېر کال چې د ټاکنو په قانون کې کوم اصلاحات راغلل، د ولسمشرۍ ټولو نوماندانو د ټاکنیزو کمېسیونونو لپاره نوي کمېشنرانو ټاکلو لپاره رایه ورکړه او دغه کار د کمېسیونونو باور ډېر زیات ټینګ کړ. همدا شان غواړم ووایم چې د ټاکنیزو کمېسیونونو دواړه مشرانې مېرمنې دي.

په پای کې غواړم د سولې موضوع ته اشاره وکړم. افغانستان د داسې یوې سولې په لټه کې دی چې د افغانستان د حکومت، خلکو او طالبانو ترمنځ خبرو ته زمینه برابره کړي.  د ۲۰۱۸ کال له فبرورۍ میاشتې راهېسې د ملي یووالي حکومت د سولې لپاره پرلپسې کارونه کړي دي، لکه طالبانو سره له قید او شرط پرته د خبرو وړاندیز، د بریالي اوربند اعلان، د ترهګرۍ او بنسټپالنې د غندلو لپاره د نړۍ او افغانستان د دیني علماوو راټولول، د حکومت د مذاکراتي ټيم اعلانول، د سولې لپاره د نقشې جوړول او د مېرمنو اوسړیانو په شمول د بېلا بېلو افغانانو ترمنځ د خبرو په هدف د عمومي اجماع ترسره کېدو ته اسانتیاوې برابرول و.

راتلونکې میاشت د سولې لپاره لویه مشورتي لویه جرګه راغواړو. مونږ له طالبانو سره د مشروع سولې توافق په هدف چې تمه ده په په ۲۰۱۹ کال کې ترسره شي، باید باوري و اوسو. اوس غواړم طالبانو او د هغوی ۴۰ زره پلي سربازانو ته چې د افغانستان په خاوره کې فعالیت کوي، د پیغام په ورکولو خپلې خبرې پای ته ورسوم. دا پیغام د یو میلیون په شا وخوا کې د ملکي خدمتونو او حکومتي مامورینو دی چې تېرو ۱۸ کلونو کې د امنیتي او دفاعي ځواکونو په قربانیو جوړ شوي دي. د افغانستان خلک او د افغانستان حکومت د تاوتریخوالي د پای لپاره له طالبانو سره د سولې مخامخ خبرو پیل ته چمتو دی. دا اوس طالبانو پورې اړه لري چې د سولې لپاره ګام پورته کړي، مونږ به هغه مهال پر دغې موضوع باور وکړو چې په خپلو سترګو يې ووینو. تر هغه وخت به لکه د تېر په څېر خپلې مبارزې ته دوام ورکړو.

له تاسو مننه!

د واشنګټن ډي سي ـ هدسن انسټیټوب کې د امریکا ــ افغانستان د راتلونکو اړیکو په اړه د هېواد د ملي امنیت سلاکار ډاکټر حمدالله محب د وینا بشپړ متن:

د افغانستان لخوا لید لوری. له سفیر حسین حقاني سره بې پرې بحث

Hudson Institute

Washington, DC

March 14, 2019

زه غواړم لومړی د هغه څه په اړه چې په دې مشارکت کې يې افغانستان ترسره کوي او وروسته هغه څه چې مونږ یې له خپلو شریکانو تمه لرو، خبرې وکړم.

افغانستان نن ورځ تغییر کړی دی. مونږ نور د نړۍ امنیت ته ګواښ نه یو. له شک پرته چې مونږ تېرو ۵ کلونو کې د اصلاحاتو لپاره ګامونه پورته کړي دي، تر څنګ يې د ځان بساینې لپاره مو هم کار کړی دی.

افغانستان تېرو ۱۸ کلونو کې ټولنیز تغییر کړی دی. مونږ په جدي ډول خپل اساسي قانون او ډموکراټیکو بنسټونو باندې باور لرو. مونږ خپله راتلونکې د نړۍ په ډموکراټیکو ټولنو کې ګورو.مونږ په سیمه ییز اتصال کې مخکې یو. زمونږ زړور امنیتي او دفاعي ځواکونه نه یوازې له خپلې ځمکنۍ بشپړتیا دفاع کوي، بلکې د نړۍ له ترهګرۍ سره د مبارزې په لومړۍ کرښه کې هم دي. مونږ د نړیوالې ټولنې په ځانګړې توګه د امریکا سټراټېژيک ملګر یو.

مونږ، افغانانو او امریکا د ډېرو قربانیو په ورکولو سره، دلته رارسېدلی یو چې د یو ملت په توګه ترې مننه کوو.

 په ۲۰۱۷ کال کې د سویلي آسیا لپاره د ولسمشر ټرمپ د سټراټېژۍ تر اعلان وروسته، افغانستان او امریکا د مشارکت نوي پړاو ته ننوتل.  دغه سټراټېژي سیمه کې د بدلون لپاره وه. ځکه شرایطو ته په کتلو برابره شوې وه. نه د وخت په اساس. ددې ستراتیژۍ په اساس زمونږ یو شمېر مخرب ګاونډیان تر سخت فشار لاندې ونیول شول. وروسته بیا دغه ستراټېژي د افغان ځواکونو په تجهیز او دغو سرتېرو ته په مشورو متمرکزه شوه. مونږ باوري یو چې دا زمونږ په مشارکت کې تر ټولو غوره کړنلاره وه.

غواړم ووایم، افغانستان کې روانه جګړه نور د امریکا نه ده. افغان دغه جګړه خپله پر مخ وړي. هغه همکاري چې د امریکا لخوا د ترهګرۍ ضد مبارزې برخه کې ترسره کېږي، همغږي او متقابله ده. مونږ زیاته قرباني ورکوو، نه یوازې دا چې له خپلو خلکو دفاع کوو، بلکې هغه ډلې هم له منځه وړو چې د نړۍ امنیت له ګواښ سره مخ کوي.

دا هغه درک دی چې مونږ یې له مشارکت څخه لرو او زیات دلایل شتون لري چې مونږ باوري کوي تر څو دغه مشارکت دوام پیدا کړي.

د هغې سیمې یوه برخه چې مونږ په کې قرار لرو،  اوس نړۍ ته جدي ګواښ دی چې او هلته لسګونه ترهګریزې ډلې فعالیت کوي.  مونږ باور لرو چې ترهګري یو نړیوال مشکل دی چې اوږد مهاله نړیوال

ځواب ته اړتیا لري او افغانستان له دې ګواښ  سره مبارزه کوي. لکه څنګه چې د ناټو سر منشي سټولټنبرګ د تېر کا په وروستیو کې وویل، د تللو لګښت د اوسېدو تر لګښت زیات دی.

خو دغه همکاري ثابته نه ده. بدلونونو ته په کتلو د دغو همکاریو په اړه د بیا کتنې دروازې پرانېستل کېږي.

د افغانستان دولت په مشارکت کې احتمالي تغییراتو ته چمتو دی. زمونږ امنیتي او دفاعي ځواکونه په خپلواک ډول له خپلې خاورې دفاع کوي او وروستیو پنځوو کلونو کې مو زیاته هڅه کړې چې د خپلو سرتېرو لپاره لا زیاتې مالي سرچینې جذب کړو.

زمونږ د دولت دغه درک له اوږدمهاله همکاریو څخه دی. اوس له امریکا متحدو ایالتونو څخه غواړو چې روښانه کړي تر څو زمونږ په هېواد کې د دوی ستراتیژي او اوږدمهاله ګټې څه دي؟

زه فکر کوم چې له مونږ څخه هېڅ یو هم په ناڅاپه ډول په هغه مشارکت بیا کتنه نه کوو چې په تېرو دوو لسیزو کې پرې پانګونه شوې ده. افغانان جدي اندېښنې او د سولې له پروسې وېره لري چې تر نن ورځې هېڅ افغان استازی په هغه کې شتون نه لري.

افغانستان د امریکا  او نړیوالې ټولنې د ستراتیژیک او اږد مهاله متحد په توګه اوس زیات څه ته زمینه برابرولی شي.  مونږ اسلامي ولسواکي یو چې په شدت سره د امریکا د متحدو ایالتونو متحد پاتې شوي یو. په سټراتیژیک ډول د سویلي او مرکزي اسیا ترمنځ د پل په حیثت قرار لرو او د سیمې هغه زړه دی چې تل نړۍ ته ګواښ له همدې ځایه خیژي. خو په عین حال کې اقتصادي فرصتونو پورې هم تړلي و. مونږ په دې باور یو تر هغه چې نړیوال ترهګریز ګواښ پر ځای وي، افغانستان به یو مهم متحد وي، ان که له طالبانو سره سوله هم وشوه، د تغییر وړ به نه وي.

د ملي دفاع د نوي سرپرست وزیر د معرفۍ مراسمو کې د افغانستان د اسلامي جمهوریت د ملي امنیت سلاکار ‌‌‌‌‌‌‌ډاکټر حمدالله محب د وینا متن:

د ټولو هغو نظامي او ملکي مبارزینو او سربازانو دې ارواوې ښادې او جنتونه نصیب وي، چې د افغانستان د خاورې، خلکو او ارزښتونو په دفاع کې یې ځانونه نذرانه کړي دي
مونږ به ددوی فداکارۍ کله هم له یاده ونه باسو او مونږ به کله هم ددوی په وینو معامله ونه کړو.

ترهګر او نور وسله وال مخالفین چې له هرې خوا حمایه کېږي، د افغانانو عزم نشي ماتولای بلکې ورځ تر بلې د وطن ساتنې او نوامیسو ددفاع روحیه زمونږ په ملت کې پیاوړې کېږي. 
زمونږ لپاره دښمن واضح تعریف لري، هرڅوک چې د نظام د تخریب هڅه کوي، هغه دښمن دی او موږ به یې په مقابل کې جدي اقدام کوو.

سوله لومړیتوب دی، افغان وژنه به دروو، اما سوله به له هغوی سره کوو، چې سولې ته قلباً اماده وي. څوک چې جنګ غواړي، افغانان وژني، د پردیو د ګټو لپاره افغانستان ورانوي، یا نظام ته ګواښ پیښوي، په ټول طاقت به یې مخه نیسو.
د نظام او ملت د دښمنانو پر وړاندې د قوې استعمال مشروع حق دی او باید په قاطعیت او مسوولیت سره استعمال شي.

ښاغلی اسدالله خالد خپلې ځانګړتیاوې لري، په امنیتي استخباراتي برخه کې دده تجربه، قاطع دریځ، له دښمن څخه یې شناخت، ددې باعث شو، چې ددفاع وزیر وټاکل شي. په نوموړي څو وارې ددښمن بریدونه دا په ډاګه کوي، چې هغوی له خالد سخت وېرېږي او نن ورځ دفاع وزارت ته د همداسې رهبرۍ اړتیا ده.
مونږ د سولې د بې درېغه هڅو ترڅنګ چې ترسره کوو یې، دا هم وینو چې د افغانستان د خلکو او خاورې دښمنانو څو ورځې وړاندې د کار وزارت تر۳۵ زیات کارکوونکي شهیدان کړل. دا وضعیت پاملرنې ته اړتیا لري، تر سیاسي مخالفتونو او تعاملاتو زیات اوس مونږ ته د جنګ مدیریت کول لومړیتوب دی او دا ګمارنې د افرادو د تغییر تبدیل تر معمول زیات زمونږ د عزم تجدید ښيي.

د ښاغلي خالد په مخ کې مهم ماموریت پروت دی، جګړه باید مدیریت شي، دښمن باید سولې ته اړ کړل شي او په امنیتي نهادونو کې په واقعي مانا اصلاحات رامنځ ته شي. 
ولس له مونږ نه جدي توقعات لري، ددوی د سر، مال او عزت ساتنه زمونږ مسوولیت دی. د یو مسوول، صادق او کارا نسل په توګه باید دغه ملي او وجداني وظیفه په ښه شکل سرته ورسوو او خپل هېواد او قدرمن ولس له تکلیفونو او مشکلاتو راوباسو.

ښاغلي خالد ته توفیق غواړم او باور لرم چې په دفاع وزارت کې به ډیر موثر ثابت شي.
و من الله توفیق

Page 1 of 1